ஒரு ஊர் என்பது அங்கு வாழும் மக்களின் அடையாளம் மட்டுமல்ல, அது ஏராளமான சுகங்களையும் துக்கங்களையும் வரலாறுகளையும் வாழ்வியலையும் தன்னுள் அடைகாத்து வைத்திருக்கும் ஒரு கூடு. பிற உயிர்களுக்குப் பிறந்த மண் என்பது பெயரளவுதான். மனிதனுக்குப் பிறந்த மண் என்பது ஆயுள் ரேகையின்ஆரம்பப் புள்ளி. எந்தத் தலைமுறையும் பிறந்த மண்ணின் வரலாறு தெரியாமல் பிறப்பெடுப்பதில்லை. அப்படிப்பட்ட ஒரு வரலாற்றைத்தான் பெற்றெடுத்திருக்கிறது இப்புதினம். நதிக்கரை ஊர்களில் இருந்து நாகரிகம் தோன்றியதாக வரலாறு உண்டு. ஆனால் அதே நதிக்கரையில் மூன்று ஊர்கள் அழிந்து மூன்று ஊர்கள் தோன்றிய முதல் வரலாறு, திருநெல்வேலி தாமிரபரணி நதிக்கு இருக்கிறது. ஒரு காலத்தில் தாமிரபரணி நதியின் வெள்ளத்தால் பாதிக்கப்பட்ட மக்களுக்கு மறுவாழ்வு கொடுக்கும் வகையில் மூன்று புதிய ஊர்களை உருவாக்கித் தந்தனர் அன்றைய ஆங்கிலேயர்கள். அவர்களின் பெயர் தாங்கியே இன்றும் அந்த ஊர்கள் கேம்பலாபாத், பேட்மாநகரம், பர்கிட் மாநகரம் பர்கிட் மாநகரம் என அழைக்கப்படுகின்றன. அக்காலங்ளில் ஏற்பட்ட வெள்ள பாதிப்பு பற்றியும் அங்கு வாழ்ந்த மக்களைப் பற்றியும் புதிதாகத் தோன்றிய மூன்று ஊர்களில் ஒன்றான கேம்பலாபாத் பற்றியுமான வரலாறுகளை ஒன்று திரட்டி உருவாக்கப்பட்டிருப்பதே ‘நீர்ப்பரணி' நூல். இதில் உள்ள கதையும் காட்சியமைப்புகளும் வாசிப்பவரின் மனதுக்குள் ஊடுருவி, மறைந்துபோன வாழ்வின் வரலாற்றைப் புரிய வைக்கும், கொஞ்சம் உருக வைக்கும், நிறைய உறைய வைக்கும்.