தீரா பிரியங்களின் மேல் உருளும் கோலிக் குண்டுகளைப் போல இந்த காதல், வாழ்வெனும் பெருவெளியில் கண்களின் வழியே வாணவேடிக்கை காட்டிக் கொண்டிருக்கும். மனதுக்குள் மத்தாப்புகளை சூடிக்கொள்ளும். இதயத்துடிப்புகளின் அலை வரிசையில் கடிதங்களை கவிதையின் இசையாக மொழிபெயர்த்து கொண்டிருக்கும். தவிப்புகளின் ரீங்காரத்தினூடே பிறை சூடும்  வானவில்லாய் பார்த்த முகம், நிறங்களாய் உதிர்ந்து நெஞ்சத்தில் நிறைந்திருக்கும். அவ்வாறான  காதலின் சங்கதிகளை எல்லாம் சங்கீதங்களாக உருமாற்றி உருவாக்கப்பட்டிருப்பதே மா. காளிதாஸின்  'நீ பாரித்த என் உதடுகள்' எனும் இத் தொகுப்பு. நவீனமாக  இருப்பதும் அதை ரசிக்கும் வகையில் காட்சிப்படுத்தி சொல்லி இருப்பதும், காட்சிகளை உடைக்கும் காதலை கவிதையாக  எழுதி புரிய வைப்பதும்  இந்நூலின் பலம்.